A comezos de curso para desenvolver o Proxecto Documental Integrado sobre o que ía xirar a actividade das aulas atopámonos con tres propostas ben atractivas : "O Camiño de Santiago", "O Cinema e a Televisión" e "A Arte na Escola".
Xa dende o primeiro día comezamos coas pescudas sobre as distintas suxestións e logo de estar ben informados e informadas votamos...
Saiu escollida a terceira opción ARTE ( PDI + ARTE)
Nas nosas aulas xa fixeramos unha saída cultural para observar a paisaxe costeira da nosa contorna. Ao termos centrado en observar ás árbores decidimos que tamén o PDI podía traballar as diferentes artes e a pegada que a natureza deixou nelas, comezando polas árbores a través da pintura, literatura,cine...
Vendo o cartaz do PDI elaborado pola biblioteca, fixemos os nosos propios carteis cos "eslogans" da nosa temática, utilizando a ferramenta "tucs paint" nos nosos ordenadores persoais. Xuntandoos todos elaboramos un gran mural co nome do proxecto que nos servirá, ademais, para expoñer parte dos nosos traballos.
Ao longo do trimestre e a través de 3 pintores impresionistas: Pissarro, Monet, e Sargent, e do modernista Klimt estamos a elaborar catro cadernos en cada clase. Cada grupo (4, 5 ou 6 compoñentes) analiza o artista, a súa obra e época, o uso da cor e tamén a partir da observación do cadro escollido en cada caso no 2º trimestre crearemos pequenas obras literarias traballando tanto o xénero dramático como a prosa e a lírica. E nos achegaremos a eses dous movementos artísticos noutras artes:
Ao remate desta tarefa teremos en cada aula catro albumes sobre os autores e a súa obra que depositaremos na biblioteca logo de presentala ao resto da escola.
E chegou o tempo de nadal e nas nosas aulas estudamos a abstracción pictórica. Inspirándonos na técnica xeométrica utilizada polos autores dese movemento, adornamos as portas das aulas.
E así chegamos a remates do trimestre adicándoo ao cine e iniciando o coñecemento desa arte co filme
"O bosque animado". Xa vos contaremos!
Unicamente nos queda desexarvos... Un Nadal ben artístico!!!
Ningún comentario:
Publicar un comentario